Namaskar Mitron, main hoon aapka Mitr, Tushar, Charu Creation Pvt Ltd se jo ki ek Fashion Fabric company hai Nehru Place, New Delhi me. Mitron, is video mein hum detail me, vistaar me baat karengey Satin fabric ki. Mitron, Satin kissi particular fiber, kissi vishesh reshey ka naam nahi apitu Satin asal mein teen fundamental weaves me se ek weave, teen mukhya bunnai me se ek bunaai ka naam hai. Baaki ki do mukhya weaves hain Plain weave aur Twill weave. Satin weave me several weft yarns artharth kayi banney key soot ek warp yarn artharth ek tanney key soot key upar sey bunney jaatey hain. Ya iska totally opposite, bilkul viprit hota hai. Iska matlab several warp yarns artharth kayi tanney key soot ek weft yarn artharth ek banney key soot key upar sey bunney jaatey hain. Satin weave kayi prakaar ki ho sakti hai:
Bazaar me aapko Silk Satin, Viscose Satin, Polyester Satin, Cotton Satin itiyaadi fabrics saralta sey uplabdh ho jayengey. Chahey koyi bhi resha ho, satin fabric long aur continuous fibers, lambey aur aviral reshon se satin weave mey bunna jaata hai. Inn long aur continuous fibers ko, lambey aur aviral reshon
ko Filaments kaha jaata hai. Mitron, Doosri weaves ki tulna me, satin weave mein kamm interlaces hoti hain, kamm jild hoti hain. Aur issi kaaran, satin weave me bunney huey fabrics, plain weave me bunney huey fabrics ki tulna me adhik shiny, smooth aur elastic hotey hain, zayaada chamakdaar, narm aur lochdaar hotey hain. Body-Curves ko accentuate karney key liye, shareer key vakron ko ubharney key liye Satin fabric apni halki elasticity, apney halkey se lachileypan key kaaran ek acha option hai, ek uttam vikalp hai. Apni sundar aur akarshak drape key kaaran, satin fabrics ka evening wear dresses khaaskar evening gowns aur curtains bananey mein badi maatra me upyog hota hai.
Plain weave sey bunney gaye fabrics ki tulna me Satin weave sey bunney gaye fabrics zayaada durable aur Wrinkle-resistant hotey hain, adhik tikao aur shikan pratirodhee hotey hain. Satin fabric ki ek side, ek satah soft aur lustrous artharth mulayam aur chamakdaar hoti hai jabki doosri side, doosri satah dull artharth mand hoti hai. Haalanki, mulayam aur slippery, fislan waala fabric honey key kaaran, Satin fabric ko Silney me kathinaayi hoti hai. Mitron aap jaan key achambhit hongey ki Lambey baal waaley logon ko, Long hairs waaley logon ko ko satin fabric ki bed sheets par sona, vishraam karna bahut aaramdayak lagta hai. Aisa issliye ki baalon aur satin fabric se banni bed sheet me friction nahi hota, gharshan nahi hota aur baal bedsheet mein ulajhney aur tootney key bajaey bedsheet par smoothly glide kar jaatey hai, bedsheet par komalta sey sarak jaatey hain.
Mitron, satin fabric ki khoobiyan yahin khatam nahi hoti. Pure Silk, shudh resham se banna satin fabric breathable artharth hawadaar honey key kaaran hypoallergenic bhi hota hai. Iska arth yeh ki skin se touch honey par, twacha se sparsh honey par yeh fabric kissi prakaar ki allergy utpan nahi karta. Saath hi saath silk satin fabric twacha sey sparsh honey par static electricity, isthir vidyut bhi utpan nahi karta. Apni inhi khoobiyon key kaaran Silk Satin fabric sey banni bed sheets kaafi lokpriye hain.
Mitron, ab baat kartey hain different varieties of Satin fabric ki, bhinn bhinn prakaar key Satin fabric ki. Pehla Prakaar hai Antique Satin: Issey Satin Back Shantung fabric key naam sey bhi pukaara jaata hai. Antique Satin fabric filaments key bajaay unevenly spun yarns se weave kiya jaata hai, asamaan roop sey katey hue sooton se bunna jaata hai. Yeh fabric doosrey Satin fabrics ki tulna mein heavy artharth bhaari hota hai. Iski satah bhi tulnatamak taur pey dull hoti hai, mand hoti hai. Iss fabric ka badi maatra mein upyog Upholstery, curtains, draperies, bedding, accessories key nirmaan mein hota hai. Agla prakaar hai Charmeuse Satin ka: Iss prakaar ka Satin Fabric bahut lightweight, halkaphulka, bahut shiny, Yaani chamakdaar honey key saath saath clingy bhi hota hai, artharth shareer se chipakta hai.
Charmeuse Satin ka upyog dresses khaaskar wedding dresses bananey mein kiya jaata hai. Teesra prakaar hai Crepe back Satin fabric ka: yeh ek reversible fabric hai, prativartee kapda hai jissme ek side satin finish hoti hai aur doosri side crepe finish. Dresses bananey key saath saath iss fabric ka upyog lingerie bananey key liye bhi kiya jaata hai. Agla Prakaar hai Duchess Satin ka: Normal Satin ki tulna mein yeh fabric zayaada heavy aur stiff hota hai, Adhik bhaari aur kada hua hota hai. Aamtaur pey solid colors mein dye kiye gaye Duchess Satin ko dresses bananey key liye use kiya jaata hai. Iss prakaar waali Satin mein apni shape, apna aakaar banaye rakhney ki outstanding ability hoti hai, zabardast shamta hoti hai. Agla prakaar hai Double faced Satin ka: Is medium weight, madhyam vazaani satin fabric mein dono sides, dono satah par satin finish hoti hain.
Iska matlab, iss fabric ki donno sides shiny hoti hain. Lingerie manufacturing mein yeh satin variety badey istar par upyog ki jaati hai. Agla prakaar hai Stretch satin ka: Iss fabric mein bahut chhoti maatra mein elastane, spandex ya kahein lycra ka yarn mix hota hai joh issey stretch ya khinchaav pradaan karta hai. Wedding gowns, lingerie sey lekar party wear dresses key nirmaan mein iska upyog kiya jaata hai. Inn sab varieties key alawa bhi aur kayi varieties jaise Baronet Satin, Messaline, Slipper Satin, Farmer Satin, ityaadi bazaar mein uplabdh hain. Mitron, Satin fabric ek bahut versatile fabric hai, bahuupyogi kapda hai. Dresses, Lingerie, Inner Lining, Upholstery, Home decor, Neckties, Hats, Shoes, Neckbands, Scarves, Purses, Ribbons, Clutches aur kayi aur vastuon kay nirmaan mein Satin fabric sahayak hai. Mitron ab baat kartey hain, satin fabric ki wash care ki, rakh rakhaav ki. Sabhi prakaar key satin fabrics kay liye dry-cleaning preferred method, pasandeeda tareeka hai haalanki synthetic satin fabrics ko hand wash kiya ja sakta hai, artharth kritrim satin key kapdo ko haath sey dhoya ja sakta hai. Adhikansh Satin fabrics ko iron, istree kiya ja sakta hai. Behetar hoga ki satin say banney item ko inside out kar ke iron kiya jaaye, andar ki satah par istree kiya jaaye. Direct ironing could be dangerous, seedhey taur pay satin ki Satah par istree lagana hanikarak ho sakta hai issiliye ek protective layer jaise cotton cloth ka upyog recommended hai, anusanchit hai.
Mitron, Water-spray, paani ka chidkaav satin kay kapadey par dhabbey chhod sakta hai, issiliye istree kartey samay iss sey bachein. Mitron, Agli cheez jiskey baarey mein aapko dhyaan rakhna hai, woh hai ki satin fabrics ko madodna nahi hai. Satin fabrics should not be wrung. Satin items ko seedhi dhoop sey bachata huey hangar par sookhney dein. Aaj ka fun fact, rochak tathya! France key famous tourist spot, prasidh paryatan isthal, paris key nikat isthith Palace of Versailles me upasthtith saarey furniture ki sajaavat, decoration satin fabric sey ki gayi hai.
Mitron, iss video ko dekhney ke liye main aap sabhi ka bahut bahutabhaari hoon. Main aasha karte hoon ki hamare fabrics se banaye huye products aapke jeevan me sakaraatmak urja, positive energy ko badaayenge. Satin fabrics ki collection dekhne ke liye, niche description me diyegaye link pe click kare. Kissi bhi prakar ki fabrics ki jaankaari key liye aap humme +91-9971106200 par call kar sakte hain ya charu@charu.org.in par email bhej sakte hai. Doston, aap agla video kiss vishay par dekhna chahengey, comment box me avashya likhe. Dhanyawaad, Aapka din shubh ho.
